شر البلية ما يضحك…سيدة سودانية تحكي هروب زوجها منها إبان سقوط مدني في يد المليشيات.

Screenshot ٢٠٢٤ ٠٨ ١٧ ١٩ ٣٤ ٤٥ ٦٧ 680d03679600f7af0b4c700c6b270fe7

قصة واقعية حدثت مع سبدة سودانية إبان اقتحام قوات الدعم السريع لمدني بوسط السودان لم نعدل في النص وتركناها كما سردها تحت عنوان

راجلي الهرب و خلاني:
انا الدعامة لما دخلو مدني كنا قاعدين في بيت اهلي كلهم سافرو برا و كان عندي طريقة اسافر معاهم لكن راجلي كان رافض تماماً عندي بت و ولد الولد عمرو ٤ سنة و البت سنتين و احنا اصلا متزوجين عن ترشيح و انا وافقت لانو وضعو كويس لكن اكتشفت انو ولد اهلو و يحركوهو يمين و شمال و الموضوع كان عامل لي نفسيات حتى لما مشينا مدني بقرار اهلو بس مع انو كان ممكن نمشي اي دولة تانية لكن هو وراهم و معاهم بس
المهم في اثناء م قاعدين نسمع صوت الضرب و الكورايك و الجوطة انا لميت اولادي في غرفة اخر البيت و قفلتها عشان اشوف الحاصل شنو لما طلعت برا لقيت راجلي وشو جايب الوان و كان بقفل في باب الشارع و جاي علي بقول لي الدعامة دخلو مدني
انا هنا طبعا اعصابي باظت شديد رجعت الغرفة لميت دهبي كلوووووو ختيتو في كيس و ختيتو في الشفاط حق الحمام و كان عندي قروش مرسلنها لي اخواني فتحت السقف المستعار و ختيتها هناك و مسكت اولادي بقيت احصن فيهم دخلو لينا الدعامة عاينو لينا و شالو الشاشات و عربية راجلي و تلفونو الحمدلله تلفوني ختيتو في صدري و انا م سألوني نهااااائي بس عاينو لي و مشو اما راجلي كان داخل في حالة رجفة انا كنت ثابتة اكتر منو
و اصوات الضرب م كانت واقفة نهائي م قدرنا ننوم بالليل كنت مره مره بفتح تلفوني اطمن امي و اخواني انا بت وحده في ست اخوان قالو لي صلاة الصبح تركبي اي عربية بي اولادك و بي اي شكل من الاشكال تمشي مكان امن و تتحركي على بورتسودان م عندك قعده ف البلد دي قلت ليهم طيب الصباح بنتصرف و نطلع و قلت خلاص اكلم راجلي يجهز اوارقنا و حاجاتنا لما يصحى صلاة الصباح
يا اخوانا لما جات الساعة ٥ و صحيت عشان اصلي لقيت راجلي مافي بقيت طبعا مخلوعة ياربي ساقوهو الدعامة و لا قتلوهو و لا دا مالو الحصل عليهو شنو كنت بس بفتش فيهو ف النهاية بقيت قاعدة منتظراهو لحد الساعة ٨ صباحاً لا حس لا خبر و اخواني يشيلو و يتصلو و اقول ليهم م بقدر اطلع و فلان مافي مشيت جهزت اوراقي و حاجاتي لقيت جوازو و حاجاتو مافي هنا انا اتستغربت لانو كل حاجاتنا سوا عشان لو جا شي م نفتش و نتأخر زي الساعة ٩ صباحا جاتني مكالمة من حماتي رديت لقيتو دا هو قال لي يا فلانة سوقي الاولاد و اطلعو انا م لقيت طريقة اجيكم كنت ماشي لي اهلي اشوفهم كيف لقيت البص واقف ركبوني معاهم م لقيت طريقة ارجع ليكم
انا كنت بضحك قلت ليهو بطل هظارك البايخ دا قال لي انا م بهظر دا الحاصل و اقفلي انا داخل على إرتكاز

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوي محمي